ILOILO CITY – Mga Ilonggo ang matuod nga nagdaug sa ginpatigayon nga transition sang mga propiedad sang Panay Electric Company (PECO) sa MORE Electric and Power Corporation (MORE Power) subong nga adlaw.
Ini ang pahayag ni Presidential Consultant for Western Visayas Jane Javellana.
Sa interview sang Bombo Radyo kay Javellana, iya ginpahayag nga wala sang nagdaug kag wala sang napierde sa tunga sang duha ka power company kun power distribution sa syudad ang pagahambalan.
Suno kay Javellana, makabig nga mga pumuluyo ang nagdaug sa tion nga sila ang makabaton sang serbisyo sa kuryente nga adlaw-adlaw nila nga ginakinahanglan.
Naga-apelar man si Javellana sa PECO nga magkooperar sa gin-serbe nga writ of possession.
Nahibaluan nga gintapik na lang sang mga sheriffs sa pader ang amo nga writ of possession matapos nga nagpamalibad ang PECO nga mag-atubang sa otoridad.
Suno kay Javellana, una pa nga ginpahayag sang PECO nga trespassing ang ginhimo nga pagsulod sang mga sheriffs kag mga empleyado sang MORE Power sa ila opisina sa General Luna Street, Iloilo City Proper.
