ILOILO CITY – Ginrekomenda ni Iloilo City Councilor Lyndon Acap sa konseho ang posibilidad sang pag-deklara sang state of Calamity sa syudad sang Iloilo bangud sa pagpamahog sa ikaayong lawas sang publiko sang Coronavirus Disease 2019.
Sa interview sang Bombo Radyo kay Acap, iya ginpahayag nga kun basehan ang data may kaangtanan sa nasambit nga balatian klaro nga peligroso ini para sa mga pumuluyo sa pungsod.
Suno kay Acap, husto na ini nga rason agud nga ikonsidera ang posibilidad nga pag-deklara sang State of Calamity sa syudad sang Iloilo
Dugang pa sang natungdan, mas maayo nga mas temprano pa nga tap-naon ang nasambit nga balatian kag indi na hulaton pa nga may yara sang magpositibo sa Iloilo.
Santo sa pahayag ni Acap isa man ini nga rason kun ngaa nagakadapat lang nga i-release na ang pondo para sa kalamidad paagi sa pag-deklara sang state of calamity kag kinahanglan ini nga diskusyunan sang konseho.
Suno naman kay Iloilo City Councilor Lady Julie Grace Baronda, chairman sang Committee on Social Services and Disaster Relief sang nakaligad pa nga semana na istoryahan sang komitiba kaupod man ang City Health kag ang team ni Iloilo City Mayor Jerry Treñas ang posibilidad nga pagdeklara sang Iloilo City Council sang State of Calamity sa syudad sang Iloilo.
Dugang sang natungdan, may yara sang lima ka mga requirement ukon category nga gina basehan bilang pagsulundan agud maka deklara sang State of Calamity.
Una na diri amo ang nagakadapat nga 20% sang populasyon ang apektado sang outbreak kag nagakinahanglan na sang emergency assistance.
Ika-duha, 40% sang palangabuhian sang pumuluyo ang apektado man sang nasambit nga outbreak.
Ika-tatlo, apektado ang mga mayor nga dalanon sa sulod sang isa ka semana nga mahimo maka apekto man sa transportasyon sang mga pumuluyo.
Ika-apat amo ang nagakadapat nga may yara ini sang epekto sa industriya sang agrikultura.
Kag ika-lima may yara sang pagka-upang sa mga mayor nga kinahanglanon sang mga pumuluyo kaangay nalang sang kuryente, tubig, transportasyon, komunikasyon kag iban pa nga indi mahimo mabalik sa sulod sang isa ka semana magluwas lang sa mga highly-urbanized nga lugar sa diin indi mahimo nga mabalik ang mga nasambit nga butang sa sulod sang 24 ka oras.
Santo sa pahayag ni Baronda, nakig-angot na sila sa National Disaster Risk Reduction and Mnagement Office (NDRRMC) kag Office Of the Civil Defense (OCD) kun mahimo nga basehan ang pag dekalara sang state of public health emergency agud nga maka deklara man sang state of calamity ang syudad sang Iloilo.
