ILOILO – Indi big-deal kay Iloilo Gov. Arthur Defensor Jr. nga ang disenyo ni Bohol Gov. Arthur Yap ang ginkilala sang National Inter-Agency Task Force kun angkas sa motorsiklo ang pagahambalan.
Sa interview sang Bombo Radyo kay Defensor, iya ginpahayag nga mas nauna siya nga nagpasa sang disenyo sa Land Transportation Office kag sa pagkamatuod, siya pa ang nagpanguna sang demonstration agud ipakita kun ano ang mangin sitwasyon sa pagsakay sa motorsiklo.
Suno kay Defensor, sa Land Transportation Office niya ginpasa ang disenyo bangud nga ang nasambit nga ahensya amo ang regulating agency.
Ugaling lang suno sa gobernador, sa National Inter-Agency Task Force nagpasa sang disenyo si Gov. Yap.
Apisar sini, ginpahayag sang natungdan nga wala siya sang kalain sang bu-ot bangud nga iya lamang ginhimo kun ano ang makapaayo para sa kadam-an.
