Magadepende sa hepe sang Pototan Municipal Police Station, ang pagpasaka sang kaso batok sa duha ka mga pulis nga nagpinahubog, nagpalupok sang pusil kag nagpahog pa nga patyon ang hepe.
Sa interview sang Bombo Radyo kay Police Major Manny Manuel sang Iloilo Provincial Internal Affairs Service, iya ginpahayag nga mahimo ipasaka ni Police Major Ronnie Brillo ang kaso nga Grave Threat kag Conduct Unbecoming of a Police Officer batok kanday Patrolman Joerick Ace Elisan kag Police Corporal Esil Peñarubia sa National Police Commission ukon sa Regional Internal Affairs Service.
Apang suno kay Major Manuel, sa bahin sang Internal Affairs Service sang PNP, ila subong ginasentrohan ang akto sang pagpalupok sang pusil ni Elisan.
Magluwas diri, ila man ginatutukan ang pagtipon sang mga ebidensya batok sa duha ka mga pulis.
Sa subong suno sa natungdan, ila pa ginahulat ang mangin desisyon ni Brillo tuhoy sa pagpasaka sang kaso batok kanday Elisan kag Peñarubia.
