Sa maulanon nga panahon, masami nga naga-eksperyensya kita sang brownout sa diin ang kandila ang isa sa nagahatag sang kasanag sa sulod sang aton puluy-an.
Apang suno sa eksperto, mas paborable sa ikaayong-lawas ang paggamit sang scented candles bangud indi lamang ini remedyo para sa brownout, kundi mangin para sa masangkad nga mental health nga labing importante sa tunga sang nagapadayon nga pandemya.
Suno kay Chryssa Chalkia, psychotherapist kag cognitive behavioral therapist, ang scented candles ang scientifically proven nga may importante nga katungdanan sa physiological effects sang mood, stress, working capacity, kag overall mental health sang isa ka indibidwal.
Pahayag ni Chalkia, dako man ang mabulig sang scented candles sa pagpanubo sang anxiety sa diin, kun makasimhot ang isa ka indibidwal sang mahamot kag relaxing nga aroma, nagarelease ang lawas sang serotonin kag dopamine nga nagabulig sa pagregulate sang mood.
Dugang pa sang therapist, ang mga aroma kaangay sang geranium, lavender, kag peppermint, ang epektibo man agud bulngon ang pila ka psychological kag physiological disorders.
Agud malikawan ang anxiety, epektibo suno sa therapist ang mga scent kaangay sang rosemary, lemon, chamomile, kag geranium.
Panugyan sang eksperto sa mga indibidwal nga nabudlayan sa pag-maintain sang positibo nga panan-awan sa tunga COVID-19 pandemic, epektibo ang pagsindi sang citrus-scented candles, nga nagapa-boost sang enerhiya kag naga-create sang warm environment.
