ILOILO – Mahimo nga palampason sang Police Regional Office 6 ang pasugal sa namatyan kun ini ang may katuyu-an gid lamang sa pagbulig sa pamilya sang napatay.
Sa interview sang Bombo Radyo kay Pol Lt Col Joem Malong, tagpamaba sang Police Regional Office 6, iya ginpahayag nga santo man sa mandu ni Philippine National Police Chief Police Director General Archie Francis Gamboa, pahanugutan sang kapulisan ang pasugal kun isa ukon duha lamang ka lamesa kag indi na sobra-sobra ang ginagamit.
Pahayag pa ni Malong, wala pa sang mandu si Regional Director PBGen Rene Pamuspusan nga pangdakpon ang mga naga-sugal sa namatyan.
Gin-ako man sang natungdan nga ginatolerar sang kapulisan ang amo nga akto bangud daw naandan na nga nangin bulig ini sa namatyan.
Lain ang kultura sang sugal sa rehiyon ipaanggid sa Metro Manila sa diin ginahimo na ini nga pangabuhian sang mga pumuluyo, gina rentahan ang patay kag gina-pasugalan.
Suno pa kay Malong, kinahanglan pa sini sang mas maathag nga guidelines kag wala pa sang procedures kun paano magkuha sang permit ang namatyan sa mga kapulisan.
Una na nga ginpahayag ni Gamboa nga pasugtan sang otoridad ang pasugal sa namatyan kun indi ini sobra-sobra.
