ILOILO CITY- Padayon pa ang imbestigasyon sang mga health experts sa pagtuhaw liwat sang monkeypox sa pila ka European countries kaangay sang Italy, Sweden, Spain, Portugal kag United Kingdom kag amo man sa US, Canada kag Australia.
May bag-o nga kaso man nga nareport sa Belgium, France, Australia kag Germany.
Santo sa World Health Organization(WHO),ang monkeypox pinaka- common sa remote parts sang Central kag West Africa.
Sa interview sang Bombo Radyo kay Dr. Philip Ian Padilla, isa ka public health expert, iya ginpahayag nga ang monkeypox isa ka rare viral infection nga masami nga mild kag naga-rekober ang pasyente sa sulod sang pila ka semana.
Suno kay Padilla, ini nga virus ang wala nagalapta sang dali-dali kag ang risgo sa mas madamo nga tawo ang tuman ka manubo.
Pahayag ni Padilla, wala pa sang specific nga bakuna para sa monkeypox, apang ang isa ka smallpox vaccine ang nagatanyag sang 85% protection bangud nga halos pareho lang ang duha ka viruses.
Nahibaluan nga ang una nga kaso sang siyam ka confirmed cases sa UK ang na- report sang Mayo paagi sa pasyente nga nagbyahe sa Nigeria, kun sa diin ginapatihan nga nakuha nila ang virus bag-o sila nagbalik sa England.
Sa bahin sang Australia, na-detect ang una nga kaso sa lalaki nga nagmasakit kasunod sang iya byahe padulong sa UK.
Sa North America, ginkumpirma sang health authorities sa US state of Massachusetts nga isa ka lalaki ang na-infect matapos nagbyahe sa Canada apang yara na ini sa hilway nga kahimtangan.
