ILOILO CITY – Nagasentro sa madinalag-on nga pag-abot ni Jesus sa Jerusalem ang pagdumdum sang Palm Sunday ukon Domingo de Ramos.
Sa interview sang Bombo Radyo kay Msgr. Meliton Oso, director sang Jaro Arcdiocesan Social Action Center (JASAC), iya ginpahayag nga santo sa kasulatan, nagpanago si Jesus gikan sa mga Pariseo nga nagatuyo nga magpatay sa iya apang ang iya nga pagpanago ang indi tungod sa kahadlok kundi bilang pagsunod sa gintagna sa iya sang Diyos nga Amay.
Ang gintagna nga adlaw sang pag-abot ni Jesus sa Jerusalem amo ang gintawag nga Domingo de Ramos sa diin iya nga ginsakyan amo ang sapat nga asno nga nagasimbolo sang iya pagka-hari nga ginsug-alaw sang mga tawo nga nagawagayway sang Olive leaves nga palatandaan sang kadalag-an.
Sa tagsa ka lugar suno kay Msgr. Oso, nagadepende man ang pagsaulog sang Palm Sunday sa diin diri sa Pilipinas, ang dahon sang niyog amo ang ginapabenditahan.
Kadungan sini, gin-athag sang natungdan nga wala man sang malain kun himuon nga anting-anting ang mga ginpabenditahan nga ramos ukon ano man nga memorabilya apang indi man dapat pagkalimtan ang pagsalig sa Ginuo kag updan sang paghalong.
Ang mga ginbenditahan nga memorabilya ang indi dapat nga ihaboy kasubong sang basura sa baylo, ini ang ginalubong ukon ginasunog.
Mas makapaayo man suno kay Oso nga ang mga daan nga ginpabenditahan nga memorabilya ang ihatag sa simbahan bangud nga ang abo sini ang ginabadlis sa tion sang kwaresma.
