ILOILO CITY- Nabaton na sang mga suspects sa Claire Diergos Murder Case ang subpoena halin sa Iloilo Provincial Prosecutor’s Office.
Sa interview sang Bombo Radyo kay Atty. Dwight Trasadas, ginkumpirma niya nga may yara sila sang tubtob Pebrero 11,2022 agud mag- file sang ila nga counter affidavits sa prosecutor.
Suno kay Trasadas, igatiglawas niya sa kaso ang mga masunod nga suspetsado:
-Former San Dionisio, Iloilo Mayor Peter Paul Lopez
-Saliha “Sally” Lopez, ikaduha nga asawa ni Peter Paul Lopez
-Carlos Paul “Poypoy” Lopez, anak ni Peter Paul sa una nga asawa
-Felix Carlos Lopez, anak ni Peter Paul sa una nga asawa
-Christian Paul “Chad” Lopez, councilor sang San Dionisio kag anak ni Peter Paul kag Sally
-Raffy Sorioso, personal driver kag body guard sang pamilya Lopez
Nagapabilin naman nga indi pa maathag kun sin-o ang magatiglawas sang isa pa ka suspek nga si Gardo Ibrahim, nga isa man ka driver kag bodyguard sang pamilya Lopez nga anom ka tuig na ang nakaligad apang indi na konektado sa ila; kag si Rodelyn Sumbong, ang kabulig ni Diergos.
May isa ka John Doe kag Jane Doe ang nalakip man sa murder complaint.
Ginapanindugan naman sang kampo sang mga Lopez nga wala sila sang kahilabtanan sa krimen kag ang mga sirkumstansiya nga yara sa affidavit sang mga testigo ang kulang kag indi maka-establish sang probable cause.
Ginatum-ok naman sang kampo sang mga Lopezes si Sumbong bilang main suspect sa krimen.
