ILOILO CITY – Indi pa makaluwas si Executive Secretary Victor Rodriguez sa salabton sa pag-draft sang Sugar Order No. 4 nga magapahanugot kuntani sa pag-import sang 300, 000 metric tons sang kalamay.
Suno kay Senator JV Ejercito, temprano pa para mag-clear sang mga tawo samtang wala pa natapos ang imbestigasyon.
Dugang pa niya, may yara pa siya sang mga palamangkutanon kag dapat nga klaruhon.
Pareho man ang nangin pahayag ni Senate Minority Leader Aquilino “Koko” Pimentel III.
Suno sa iya, may yara pa siya sang gusto nga ipamangkot kay Rodriguez.
May yara siya sang iga-double check kag lakip na diri ang interpretation ni Rodriguez sa memo sini kay anay Department of Agriculture (DA) Undersecretary Leocadio Sebastian kag follow questions nga maga-depende sa iya mangin sabat.
Suno naman kay Senator Risa Hontiveros, indi pa ma-clear ang isa ka tawo kun wala pa siya napamangkot sang mga senador.
Sang nagligad nga semana, ginpahayag ni anay DA undersecretary Leocadio Sebastian nga ginpirmahan niya ang Sugar Order 4 base sa otoridad nga ginhatag sa iya ni Executive Secretary Victor Rodriguez pinaagi sa isa ka memorandum.
Suno sa iya, santo sa memorandum nga napetsahan sang Hulyo 15, magapungko siya bilang ex officio chairman ukon member sang duly constituted administration, committees, councils, boards, bodies kun sa diin, ang Secretary of Agriculture ang isa sa mga myembro.
Sa ginpatigayon nga Senate blue ribbon committee hearing sa Sugar Order No. 4, ginpahayag ni Rodriguez nga nahibaluan lamang nila pagkatapos sang pagsinapol nga nagpasar sang resolution ang SRA pinaagi kay Sebastian nga nagapahanugot sang import order apisar nga wala nagpasa sang import plan kag wala sang ihibalo si President Ferdinand Marcos Jr.
Ginpahayag man niya nga ginkumpronta niya si Sebastian sa amo nga butang.
Suno pa sa iya, ginpahayag ni SRA administrator Hermenegildo Serafica kag ni SRA board member Roland Beltran nga nagdahum sila nga wala sang problema kaangay sang ginpahayag sa ila ni Sebastian.
Wala na napamangkot pa sang Senado si Rodriguez sang mga follow-up questions bangud nga nagbiya na ini para sa Cabinet meeting.
Sang Myerkules, dismayado si Senate President Juan Miguel Zubiri bangud indi kabahin si Rodriguez sa pagplano nga mag-issue sang kontrobersyal nga sugar order.
Dugang pa niya, si Rodriguez mismo ang nagapamuno sa pag-raid sa mga warehouses kun sa diin gina-alegar nga nabutang ang mga hoarded sugar.
