Nagpanindugan si Agriculture Senior Undersecretary Domingo Panganiban nga ginmandu kag aprubado sang Malacañang ang sugar importation nga ginhimo sang gobyerno paagi sa tatlo ka kumpaniya apisar nga wala pa sang napaguwa nga sugar order halin sa Sugar Regulatory Administration (SRA).
Suno kay Panganiban, nag-proceed siya sa immediate importation sang kalamay bangud ginkonsiderar na niya ang memorandum nga gin-release sang Office of the Executive Secretary sang Enero 13, 2023 bilang isa na mismo ka sugar order agud nga maka-diretso na sa importasyon.
Nag-insister pa si Panganiban nga nagdali siya sa importasyon sang kalamay bangud nakit-an man niya ang urgency bangud sa mataas nga inflation rates sa pungsod.
“With the urgency of the situation, I instructed three capable and accredited companies to proceed with the importation of sugar provided that they agree to reduce the prices of sugar, sell the commodity at a price that is commercially acceptable in the market, and that they will shoulder the cost…” pahayag sang senior undersecretary.
Gin-athag sini nga “informed” si President Bongbong Marcos sa desisyon.
Ginpaguwa ni Panganiban ini nga sabat matapos gin-alegar ni Senate Deputy Minority Leader Risa Hontiveros nga posible nga nagpartisipar ang gobyerno sa government-sponsored smuggling bangud may nag-abot na nga 260 ka 20-foot containers sang kalamay halin sa Thailand sang Pebrero 9 apisar indi pa epektibo ang Sugar Order No. 6. ##
