Ginbasura sang Commission on Elections (Comelec) en banc ang Partial Motion for Reconsideration sang grupo nga Pudno Nga Ilokano may kaangtanan sa disqualification case nga ila gin-file batok kay President Ferdinand ‘Bongbong’ Marcos, Jr.
Sa 15 ka pahina nga resolution nga promulgated sang Oct. 7, 2022, ginpahayag sang Comelec en banc nga wala sang “cogent” reason agud nga baliskaron pa ang findings sang First Division.
Kun madumduman, una na nga gin-deny sang former First Division ang petisyon sang amo nga grupo bangud sa lack of merit .
Ang petition sang amo nga grupo amo ang ika-pito kag katapusan nga disqualification case nga gin-file batok kay Marcos Jr.
Abril sang ginpasaka ang Partial Motion for Reconsideration sa Comelec en banc.
Sa Extremely Urgent Motion to Resolve, ginsaad sang petitioners nga kulang ang bases kag reasoning sang First Division agud i-justify ang ila nga resolution. Ginapahayag nga wala man ini nagasanto sa layi.
Suno naman sa en banc, wala sang basehan ang petitioners agud ideklarar nga kulang ang basehan kag rason sang first division.
Sa resolution naman sang Comelec en banc, ginpabaskog pa sini ang resolution sang former First Division nga promulgated sang April 20, 2022. ##
