PASSI CITY – Bugal nga ginbaton sang syudad sang Passi ang ikaapat nga Seal of Good Local Governance Award nagikan sa Department of Interior and Local Government.
Sa interview sang Bombo Radyo kay Passi City Mayor Stephen Palmares, iya ginpahayag nga indi nangin mahapos para sa syudad sang Passi nga makuha ang nasambit nga prestihiyoso nga award kun sa diin may yara sang pito ka mga kategorya nga nagakadapat nila mapasaran.
Ang pito ka kategorya amo ang Financial management, Peace and Order, Environment, Social Protection, Disaster Management, Heritage kag Tourism.
Tuman ang pagpasalamat sang alkalde sa tanan nga nagbulig kag nagkooperar agud makuha sang syudad ang nasambit nga pasidungog ilabi na sa mga pumuluyo kag mga empleyado sa gobyerno.
Suno sa alkalde, ang nakuha nga pasidungog sang syudad sang Passi isa ka pamatuod sa pagpanikasog sang gobyerno nga mahatagan sang maayo nga pangabuhi ang mga pumulyo.
Dugang sang natungdan, lakip sa pasidungog nga ila nakuha, nakabaton man sila sang P5mil cash kag may yara na man sang mga international funders nga magabulig suporta sa mga programa kag aktibidad sang syudad para sa mga pumuluyo.
Samtang, tuman man ang pagpasalamat ni Passi City Vice Mayor Jesrey Palmares sa tanan nga nagbulig sa ila agud makuha ang nasambit nga pasidungog bangud suno sa bise alkalde indi mahapos ang gin agyan nila nga ginpaanggid pa niya sa paglusot sa buho sang dagom.
