LAMBUNAO, ILOILO – Ginkumpirma ni Lambunao Mayor Reynor Gonzales nga nagikan sa ila banwa si patient number 25, ang pinakaulihi nga nagpositibo sa coronavirus disease 2019 sa probinsya sang Iloilo.
Sa interview sang Bombo Radyo kay Gonzales, iya ginpahayag nga ang 44 anyos nga babayi nga si patient number 25 ang anak ni Patient Number 16.
Nahibaluan nga si Patient Number 16 ang isa ka 70-anyos nga lalaki kag napatay sang nagligad nga Domingo, Marso 29.
Suno kay Gonzales, ang anak nga babayi amo ang nagbantay sa iya amay sa ospital amo nga may yara sila sang close contact.
Sa subong, nagapaidalom sa mandatory isolation ang amo nga infected nga pasyente kag estable na ang kondisyon.
Ang ginapahayag lima tubtob pito ka tawo sa panimalay sang infected ang ginpaidalom man sa quarantine.
Pinaagi sa ila municipal health officer, nagpasa man sang request ang local government unit sang Lambunao sa Department of Health agud nga mapasugtan man nga ipaidalom sa COVID-19 test ang 13 ka mga tawo nga naka-close contact sang infected nga pasyente.
Suno kay Gonzales, magapakig-angot man siya kay Iloilo Third District Congressman Lorenz Defensor agud nga mabuligan sila sa amo nga request.
Kaangot naman sa posible pagpatuman sang lockdown bangud sang duha ka positibo nga kaso kag kumpirmado nga local transmission, ginpahayag ni Gonzales nga diskusyunan pa nila ini kag sundon ang protocol sang Department of Health.
Nagpahayag man ang natungdan nga handa ang banwa sang Lambunao sa tion nga madesisyunan nga ipahamtang sa isa lang ka isolation facility ang tanan nga persons under investigation kag persons under monitoring.
Magluwas diri, suno sa alkalde, aktibo man ang ila nga Barangay Health Emergency Response Team kag may COVID-19 referral hospital man nga napahamtang sa ila lugar.
