Mainit nga gin-abi-abi sa Bacolod City ang pag-abot sang mga basketball stars nga magapa-indis-indis kag magadala sang kasadya sa 2024 PBA All-Star Weekend.
Natalana ini nga magsugod buwas, Marso 23-24 sa University of St. La Salle Coliseum sa amo nga syudad.
Nagpanguna sa delegasyon si PBA commissioner Willie Marcial samtang ang nagpanguna naman sa pag-welcome sa ila amo si Bacolod Mayor Albee Benitez.
Ginahulat-hulat ang main event —ang Team Japhet vs Team Barroca — sa Marso 24 kun sa diin balantayan man ang customary Dance Showdown sa tunga sang players antes ang aktwal nga hampang.
Ang Team Japeth ang pangunahan ni Japeth Aguilar kag Coach Tim Cone samtang ang Team Barroca naman ang ginapangunahan ni Mark Barroca kag Coach Jorge Gallent.
Lakip sa Team Barroca amo sanday June Mar Fajardo, Jason Perkins, CJ Perez, Robert Bolick, Jio Jalalon, Ian Sangalang, Calvin Abueva, Jayson Castro, Gabe Norwood, Ricci Rivero, Cliff Hodge, Juami Tiongson, John Pinto kag Negrense superstar James Yap.
Ang Team Aguilar ang ginabug-usan naman nanday Christian Standhardinger, Scottie Thompson, Paul Lee, Calvin Oftana, Jamie Malonzo, Chris Newsome, Don Trollano, Marcio Lassiter, Arvin Tolentino, Maverick Ahanmisi, Tyler Tio, Stanley Pringle, kag Terrence Romeo.
Sang nagligad nga tuig, matandaan nga ginhiwat ang All-Star Weekend sang amo nga liga sa Passi City.#
