Mainit nga gin-abi-abi sang mga Pinoy ang pag-abot ni President Ferdinand Marcos Jr. kag First Lady Liza Araneta Marcos sa Hanoi, Vietnam.
Diri iya ginpasalamatan ang papel sang mga overseas Filipino workers (OFWs) kag sa ila pagtipig sa reputasyon sang Pilipinas nga rason nga kilala gid ang mga Pilipino sa diin man nga bahin sang kalibutan.
May yara sang ginabanta 7,000 ka Filipinos nga nagapuyo kag naga-trabaho sa Vietnam kun sa diin professionals ang kalabanan.
Sa sini nga numero, 3,000 ang mga manunudlo bangud mataas ang demand sang English teachers sa mga eskwelahan sa amo nga pungsod kag luyag gid sang mga bataan nga Vietnamese professionals nga makatuon sa sini nga lenggwahe.
May yara man sang Filipino nurses, doctors, supervisors kag executives sa Filipino companies nga naga-operate sa amo nga lugar.
Produktibo man gilayon ang una nga adlaw sang duha ka adlaw nga state visit sang presidente bangud gin-anunsyo sini nga may isa ka Vietnamese conglomerate nga interesado nga magsulod sa Philippine battery kag electronic vehicle industry.
Natabo ini sa meeting sang presidente kaupod sa mga executives sang VinGroup nga isa sa pinakadaku nga conglomerate sa Vietnam.
Suno sa presidente, gusto nila nga magsulod sa Pilipinas bangud interesado sila sa paghimo sang baterya. Importante ini nga teknolohiya subong kag amo ang magadala sang electronic vehicles.
Nahibaluan nga ginaduso sang presidente ang pag-develop sang renewable energy industry bangud kawsa sini nga hagan-haganon ang epekto sang climate change sa coastal nations kaangay sang Pilipinas. #
