ILOILO CITY- Nangin produktibo ang duha ka adlaw nga state visit ni President Ferdinand R. Marcos Jr. sa Socialist Republic of Vietnam.
Sa iya arrival statement, ginpahayag ni Marcos nga ang iya state visit ang may handom nga pabakuron ang strategic partnership sa Vietnam, ang nagaisahanon nga strategic partner sang Pilipinas sa Association of Southeast Asian Nations (ASEAN) region.
Suno sa presidente, katuyuan man niya ang pagpangita sang dugang nga areas sang kooperasyon samtang ginapadako pa ang mga areas nga amat-amat na nga natukod.
Dugang ni Marcos, nalipay ini nga sa amo nga state visit, napabaskog pa ang maritime kag cultural cooperation, mangin ang pagbuligay sa sektor sang agrikultura, depensa, kag ekonomiya.
Gintanyag man sang Presidente sa Vietnam nga kabigon ang Pilipinas bilang secondary location agud suportahan ang manufacturing operations ilabi na sa nagapanguna nga sektor kaangay sang enerhiya, imprastraktura, automotive kag services.
Suno sa presidente, ang iya katuyuan wala lamang nagasentro sa pagpabakod sang political ties sa Vietnam, kundi ang pagpasangkad sang regional economic integration agenda nga amo ang pagtukod sang mas maayo nga kolaborasyon, innovation, kag mutual growth.
Suno sa iya, ang economic dynamism sang Vietnam kag ang strategic location sang Pilipinas ang liyabe sa sini nga kolaborasyon nga importante sa pag-uswag sang duha ka pungsod.
