ILOILO CITY- Nanindugan si President Ferdinand Marcos Jr. nga indi sini pag-imbitaron ang mga imbestigador gikan sa International Criminal Court agud magpadulong sa Pilipinas.
Suno kay Marcos, ang posisyon nga iya ginatindugan amo nga wala sini ginakilala ang jurisdiction sang International Criminal Court.
Pahayag ni Marcos, ginalantaw niya ini bilang pamahog sa soberanya bangud nga ang International Criminal Court ang gintukod agud magpatigayon kag maghatag sang hustisya kun sa diin wala sang judiciary, wala sang court system, wala sang police, kag wala sang kalinong kag katawhay kag indi amo ini ang Pilipinas.
Dugang niya, may yara sang functioning police force kag functioning judiciary ang Pilipinas kag responsibilidad nila nga halungan ini.
Matandaan nga 2019, ginkakas ni anay Presidente Rodrigo Duterte ang Pilipinas gikan sa International Criminal Court matapos nagsugod ang international body sa pag-usisa sa gin-alegar human rights violations nga nahimo sang government authorities sa pagpatuman sang iya war on drugs.
Nanindugan naman ang International Criminal Court nga may jurisdiction ini sa drug war cases bangud nga nakumiter ini sang ang Pilipinas ang myembro pa sang international body.
