Magabisita si President Ferdinand Marcos Jr. sa Canada umpisa Hulyo 1 tubtob 4 agud makig-angot sa Prime Minister sang Canada nga si Mark Joseph Carney.
Ini may kaangtanan man sa pagpauswag pa sang kooperasyon sang duha ka pungsod sa nagkalainlain nga sector, lakip na ang depensa, seguridad, kag trading.
Sa ila patigayunon nga meeting, target nga estoryahan sang duha ka lider ang pagbinuligay man sa economic resilience, energy, critical minerals, kag pagpauswag pa sang relasyon sang duha ka pungsod.
Paga-istoryahan man nila ang chairmanship sang Pilipinas sa ASEAN kag ang mga regional strategic priorities.
Nahibaluan nga ang Canada isa ka ASEAN Dialogue Partner halin pa sang 1977 kag nangin Strategic Partner sang 2023.
Suno naman sa opisina ni Carney, pagatalakayon man sang duha ka lider ang pagpadali sang negosasyon para sa Canada–Philippines Free Trade Agreement kag Canada–ASEAN Free Trade Agreement.
Ini may tinutuyo nga matapos sa sini nga tuig samtang ang Pilipinas amo ang chairman sa ASEAN.
Ginapaabot man nga makigkita si Presidente Marcos sa mga Canadian business leaders kag mga investors sa Canada sa mga industriya nga nagasuporta sa economic priorities sang pungsod.
Nalakip na diri ang information technology (IT), business process management (BPM), artificial intelligence (AI), critical minerals, kag iban pa high-growth industries suno sa Presidential Communications Office (PCO).
Kaupod ang First Lady Louise Araneta-Marcos, makigkita man si Marcos sa mga miyembro sang Filipino community sa Vancouver, British Columbia.
