GUIMARAS – Wala naga untat ang pagpatrolya kag paglibot sang Philippine Coast Guard sa bilog nga isla sang Guimaras agud tsekyaron nga wala sang makasulod nga indi otorisado sa probinsya bangud gihapon sa kahangawa sa COVID-19.
Sa interview sang Bombo Radyo kay Commander Jose Jacinto Jr., sang PCG Guimaras iya ginpahayag nga bangud sa quarantine security nga ginpatuman sa probinsya sang Guimaras, ginadumilian ang pagsulod kag pagtabok sang mga sakayang pandagat gikan sa iban nga isla.
Suno kay Jacinto, gintunga nila ang ila mga personnel agud mas ma monitor ang mga nagasulod sa Guimaras.
Sa diin iban sa ila ang nagabantay sa mga dulungkaan sa Buenavista kag Jordan samtang ang iban naman ang nagapatigayon sang coastal security patrol agud nga ma sigurado nga wala sang makasulod sa probinsya.
