Gin-athag sang Philippine Health Insurance Corporation nga pagasabton nila ang balaydan sang mga pasyente nga infected sang COVID-19 sa pungsod.
Ini apisar nga natapos na ang una nga deadline sang tinalikdan nga Abril 14 nga ila ginhatag agud maka- apply ang mga pasyente.
Suno kay Dr. Shirley Domingo, tagpamaba sang Philippine Health Insurance Corporation nagtalana lang sila sang deadline bangud wala pa sang nauyatan nga data ang ila talatapan nga mahimo basehan sa mangin case rates sang mga COVID-19 patients.
Nahibaluan nga nakasaad sa idalom sang Guidelines on the COVID-19 Community Isolation Benefit Package nga may naka-set na nga case rate packages ang ahensya para sa mga pasyente nga ma-admit sa mga level 1 tubtob level 3 nga mga ospital.
Mahimo makakuha sang P43,997 ang nagsuprer sang mild pneumonia, P143,267 sa mild pnuemonia; P333,519 sa severe pnuemonia kag P786,384 naman ang critical case sang pneumonia.
Bangud ginpatuman na ang Universal Healthcare Law, ginpahayag ni Domingo nga apisar indi rehistrado nga miyembro sang PhilHealth mahimo sa gihapon nga maka-avail sang nasambit nga package ang tanan nga mga Pilipino.
Mangin ang anay miyembro sang PhilHealth nga madugay na nga wala nakabayad ang pagasabton man sang nasambit nga ahensya.
Lakip man diri ang mga pasyente nga naka-admit sa ospital nga suspendido na ang accreditation sa PhilHealth.
Kinahanglan lang nga mag fill up ang pasyente sang designated form kag ipresenta ang proof of identity kaangay sang ID kag birth certificate.
Nagpanugyan man ang PhilHealth sa mga non-member nga makabaton sang benefit package nga magpa-rehistro sa tion nga ma discharge sila para sa ila nga database.
Sa pagpaathag ni Domingo, ang nasambit nga cash rates ang mahimo lang magamit para sa mga probable kahg kumpirmado nga kaso sang COVID-19.
