ILOILO CITY – Temporaryo nga untaton sang Philippine Air Force (PAF) ang pagpalupad sang nabilin nga walo ka Hermes 900 Unmanned Aerial Vehicles (UAV) pagkatapos nga nag-crash ang isa sa bahin sang Misamis Oriental sang Sabado.
Suno kay Philippine Air Force spokesperson Col. Maynard Mariano, grounded ang bilog nga fleet samtang nga nagahulat sang imbestigasyon.
Ang pagkadula sang komunikasyon sa ground station ang ginatutukan sa imbestigasyon.
Kung matandaan, las-9:30 sang aga sang Sabado sang ginpalupad ang UAV sa Lumbia Airport sa Cagayan de Oro City para sa isa ka check flight.
Nagdangat pa sa 10, 000 feet antes nga ginpapanaog sa 5,000 feet, 1.5 miles nagikan sa Lumbia Airport.
Wala sang may napilasan nga sibilyan kag wala man sang may naguba nga gamit sa pag-crash sang UAV.
Ginagamit ang mga UAV sang Philippine Air Force sa pagpatigayon sang aerial surveillance sa mga lugar nga gin-igo sang kalamidad kag sa counter insurgency operations sang pungsod.
Ginpasalig naman ni Mariano nga indi sini maapektuhan ang operasyon sang Philippine Air Force bangud may yara pa sang nabilin nga Hermes 450 kag iban pa nga systems nga makabulos temporaryo sa UAV nga grounded.
