ILOILO– Limitado nga mga personel ang isa ka problema sang Philippine Drug Enforcement Agency Western Visayas kun ngaa mas madamo ang mga drug personalities nga nadakpan sang iban nga ahensya kaangay nalang sang Philippine National Police kumpara sa ila.
Sa interview sang Bombo Radyo kay Mr. Alex Tabate Officer- In-charge sang Philippine Drug Enforcement Agency 6 iya ginpahayag nga sa subong may yara lang sila sang masobra sa 100 ka mga personnel.
Dugang pa sang natungdan, humalin sa Enero tubtob Agosto subong nga tuig, 178 na ka mga drug personalities ang nadakpan sa ginpatigayon nga joint operations sang PDEA kaupod man ang iban nga ahensya sang gobyerno samtang 73 lang ka mga tawo ang nadakpan sa mga operasyon nga ginpatigayon mismo sang PDEA.
Santo sa pahayag ni Tablate apisar nga may yara sila sang tawo sa mga provincial offices ginakulang man sa gihapon ang ila nga pwersa agud mas mapasangkad ang ila away batok sa ilegal nga droga.
Samtang nagsaulog naman ang Philippine Drug Enforcement Agency Western Visayas sang ila nga 17th founding anniversary kun sa diin ginhatagan sang pasidungog ang Bombo Radyo Iloilo sa wala untat nga pag suporta sini sa mga programa nga ginapatigayon sang PDEA.
