ILOILO CITY- Wala na sang vertical displacement sa Piers 4, 5 kag 6 sa Ungka Flyover nga amo sadto ang nakitaan nga may pinakadako nga pag-usmod base sa imbestigasyon sang third party consulting firm.
Ang Piers 4, 5, kag 6 nahamtang sa approach sang flyover malapit sa Christ the King Cemetery.
Sa interview sang Bombo Radyo kay Department of Public Works and Highways Region 6 Director Engr. Nerie Bueno, iya ginpahayag nga sang ginhiwat ang jet grouting, nag untat man dayon ang vertical displacement.
Apang ang mga nabilin nga mga piers suno kay Engr. Bueno, ang nakitaan pa sang mga minimal nga pag-usmod.
Dugang ni Bueno, ini ang rason nga kada semana, may yara sang monitoring nga ginahimo ang Department of Public Works and Highways Region 6 sa Ungka Flyover kun sa diin gina-survey nila ang flyover agud makit-an kun ano ang kinalain sang elevation sa subong kun ipaanggid sang nagligad.
