ILOILO CITY – Magapirma sang isa ka joint statement ang Pilipinas kag Singapore agud nga mas madamo pa nga mga Filipino health workers ang ma-hire sa Southeast Asian city-state.
Ini ang ginpahayag ni Deparment of Migrant Workers (DMW) Secretary Susan Ople sa atubang mismo sang Filipino community sa National University of Singapore kadungan sang pagbisita ni Presidente Ferdinand Marcos, Jr.
Suno sa iya, gindayaw sang Singaporean government ang contribution sang mga Filipino healthworkers sa tion sang pandemya.
Bangud sini suno kay Ople, nagapangayo sang dugang nga mga Filipino health workers ang amo nga pungsod.
Subong nga adlaw, pirmahan na ang amo nga kasugtanan upod sa Ministry of Health.
Sa amo nga event, ginpahayag ni Marcos ini ang makaresulta sang linibo ka mga job opportunities para sa mga Pinoy health workers.
Nagaplano man nga mag-hire ang Singaporean government sang Filipino aviation personnel, engineers, kag professors.
Ang gobyerno sang Pilipinas ang una na nga nagpatuman sang 7,500-deployment cap para sa mga health workers sa abroad apang suno sa Philippine Overseas Employment Administration (POEA), ang amo nga tinutuyo ang kinahanglan pa nga lab-uton.
Suno kay anay POEA administrator Bernard Olalia, as of June subong nga tuig, 2, 000 health workers gid lamang ang na-deploy sa gwa sang pungsod nga tuman ka layo sa 7, 500 nga limit.
Sang kasagsagan sang pandemya, ang gobyerno ang nagpatuman sang deployment ban kag ginsundan sang deployment cap sa mga nurses agud nga malikawan ang paghalin nila sa pungsod kasunod sang kakulangan sa health personnel sa pungsod.
Si Marcos ang nag-abot sa Singapore kahapon para sa state visit kag matapos naman subong nga adlaw.
Mismo si Health Minister Ong Ye Kung ang nagbaton kay Marcos kag sang iya delegation sa Changi Airport.
