Naga-arrange na ang Pilipinas sang bilateral meeting sa Kuwait agud ma-review ang labor agreement kag mapasiguro nga maayo ang kahimtangan sang overseas Filipino workers.
Kasunod ini sang brutal nga kamatayon sang 35-anyos nga Pinay domestic worker nga si Jullebee Ranara kun sa diin ang suspek amo mismo ang 17-anyos nga anak sang iya employer.
Suno kay President Ferdinand ‘Bongbong’ Marcos Jr., lantawon sa labor agreement kun may yara sang kapaslawan ukon weaknesses kag kun paano ini masolbar agud indi na matabo sa iban nga overseas Filipino workers.
Sa iya pagbisita sa haya sang biktima, nagpasalig ang presidente nga buligan sang gobyerno ang pamilya.
Lakip diri ang scholarships nga ihatag sa mga anak ni Ranara.
Magluwas pa ini sa mga benepisyo nga una na nga ginpromisa sang Overseas Workers Welfare Administration.
Madumduman nga Enero 27 sang ginbalik sa Pilipinas ang bangkay ni Ranara.
Ang suspek sa iya kamatayon ang yara na subong sa kustodiya sang mga pulis.
May yara man sang fact-finding team halin sa Pilipinas nga magapadulong sa Kuwait agud makit-an kag matun-an ang welfare cases kag i-address ini nga mga problema. ##
