ILOILO CITY – Naghingyo ang gobyerno sang Pilipinas sa International Criminal Court Pre-Trial Chamber nga indi na pagpadayunon ang request sang prosecutor nga ibalik ang imbestigasyon sa drug war killings sa pungsod.
Suno kay Solicitor General Menardo Guevarra, nagpasa ang Pilipinas sang “Observation on the Request of the Office of the Prosecutor to Resume Investigation into the Situation in the Republic of the Philippines” sa amo nga chamber sang international court pinaagi sa Philippine Embassy sa The Hague, Netherlands.
Ang amo nga international tribunal ang nag-set sang Septyembre 8 bilang deadline para sa Pilipinas nga maghatag sang komento sa request ni Prosecutor Karim Khan.
Gin-cite sang Office of the Solicitor General nga amo ang nagatiglawas sang pungsod ang mga argumento sa jurisdiction, admissibility kag complementarity sa amo nga submission.
Suno sa statement, ang International Criminal Court ang wala sang jurisdiction sa sitwasyon sa Pilipinas.
Ang gina-alegar nga murder incidents nga natabo sa amo nga tion ang indi makabig nga ‘crimes against humanity’ bangud nga ang mga insidente ang wala naga-qualify bilang pagpang-atake sa mga sibilyan.
Dugang pa, ang mga insidente ang indi kahimuan ukon sugo sang estado.
Sa imbestigasyon, ginahibalo kun bala ang mgan pagpamatay ang nakomiter sa tion sang drug war, sang nag-upod ang Pilipinas sa International Criminal Court tubtob sang 2019 sang nag-withdraw sa Rome Statute.
Ginpanindugan man sang Pilipinas nga ang mga reklamo nga gin-file ang gina-imbestigaran na kag gina-prosecute sang mga proper agencies sa pungsod.
Agud suportahan ini, ang Office of the Solicitor General ang nagpasa sang report sa progress sang mga imbestigasyon.
Lakip man sa mga ginpasa amo ang mga impormasyon nga nagapakita nga nakapatigayon na sang inquiry sa mga drug-related killings sa Davao region humalin sang 2011-2016 kag may yara man sang imbestigasyon sa mga krimen magluwas sa murder.
Naghatag man pungsod sang matrix sang 52 ka mga kaso kag ginabanta 300 ka iban pa nga gina-imbestigaran na sang Department of Justice.
Nagpaathag man ang Pilipinas sang extent sang drug problem sa pungsod kag ang proseso sang imbestigasyon kag ang pag-prosecute sang drug-related offenses sa idalom sang Philippine legal kag judicial system.
