Nagpanawagan si Senate Minority Leader Aquilino Koko Pimentel III sa publiko nga magbulig sa pagpamatok sa ginatos ka milyon ka pesos nga confidential and intelligence funds nga ginpain para sa mga ahensya sang gobyerno nga indi man responsable para sa pagpasiguro sang national security ukon law enforcement sa pungsod.
Suno kay Pimentel, bisan pa may gintukod nga Senate oversight committee nga amo ang magatutok sa confidential and intelligence funds, indi sini ma-justify ang amo kadaku nga pondo nga ginpain sa mga ahensya kaangay sa Department of Education nga wala man gani sang mandato nga mag-conduct sang surveillance work kag intelligence gathering.
Nagalaum si Pimentel kag si opposition Sen. Risa Hontiveros nga makakuha sang dugang nga boto halin sa iban nga mga senador agud nga makakas ang proposed confidential funds.
Partikular diri ang P500 million para sa office ni Vice President Sara Duterte kag ang P150 million para sa DepEd nga ginapamunuan man ni Duterte-Carpio.
Magluwas diri, may yara man sang confidential and intelligence funds para sa opisina ni President Bongbong Marcos nga mas daku pa sangsa gintingob nga intelligence fund sang Armed Forces of the Philippines (P1.74 billion), Philippine National Police (P800 million) kag sang Philippine Drug Enforcement Agency (P500 million).
