ILOILO CITY – Nangin produktibo ang pinakauna nga state visit ni Presidente Ferdinand “Bongbong” Marcos Jr. sa Indonesia.
Ini ang suno kay Press Secretary Trixie Cruz-Angeles matapos ang pagkitaay sang duha ka Southeast Asian leaders.
Suno kay Cruz-Angeles, nasorpresa si Marcos bangud nga ang pag-istoryahanay kay Indonesian President Joko Widodo ang nangin progresibo kun sa diin, sakup sini ang pila ka mga sector kag industriya.
Ang Pilipinas kag ang Indonesia ang naghisugot nga mag-organize sang task forces agud nga magsapol kag mag-discuss mangin sa technical level kag indi na sa political ukon diplomatic level.
Nag-witness sang pagbayluhanay sang apat ka agreements ang duha ka lider.
Ini ang may katuyu-an nga mapadalom pa ang 73 ka tuig nga bilateral relations sang Pilipinas kag Indonesia.
Lakip sa mga agreements amo ang 5-year plan nga naga-outline sang bilateral commitment sang duha ka pungsod kag ang renewal sang 25-year-old Defense and Security Cooperative Agreement.
Ginaduso man sang duha ka pungsod nga mag-upod agud nga makahatag sang dugang nga opurtunidad sa maayo nga ekonomiya sang Pilipinas kag Indonesia ilabi na sa nagatrabaho sa architecture, theater, fashion kag iban pa nga creative industries.
