30 ka adlaw nga ma-detain sa Kamara ang isa ka police brigadier general kag ang police colonel nga naangot sa iligal nga pag-aresto sa apat ka Chinese nationals sa Parañaque City sang nagligad nga tuig.
Ini amo sanday Police Brigadier General Roderick D. Mariano, former director sang Southern Police District kag si Police Colonel Charlie Cabradilla, former Southern Police District comptroller head nga gin-contempt sang House Committee on Public Order and Safety bangud sa gin-alegar nga pagbinutig.
Suno kay House Deputy Majority Leader Erwin Tulfo, maathag nga may ginatakpan ang mga pulis kaangot sa operasyon nga nagresulta sa kidnapping sa Chinese nationals nga sanday Dang Lina, Hu Yi, Ling Langping kag Li Huanhuan sang Septyembre 2023.
Gin-aprubahan man sang komitiba ang motion nga palawigon pa sa 15 ka adlaw ang detention sa anum ka mga pulis nga una na nga na-contempt kag na-detain man sa nagligad nga hearing sang Kamara.
Ini amo sanday Police Lieutenant Colonel Jolet T. Guevara, Police Major Jason D. Quijana, Police Major John Patrick Magsalos, Police Staff Sergeant Roy G. Pioquinto, Police Staff Sergeant Mark J. Democrito, kag Police Staff Sergeant Danilo L. Desder.
Sang damlag lang, matandaan nga nagsungka kay Tulfo si Michael Novecio, ang driver/bodyguard sang apat ka babayi nga Chinese citizens, kaangot sa pag-abduct sa iya nga mga employers nga ginpahayag nga kahimuan sang mga pulis.
Nagpahayag mismo si Novecio nga siya ang gingamit nga informant sang mga pulis sa Southern Police District Detective and Special Operations Unit nga amo ang iya gintudlo nga nag-detain kag nagpangawat gikan sa mga biktima sang Septyembre sang nagligad nga tuig. #
