ILOILO CITY – Liwat nga nagpahanumdom si Philippine National Police (PNP) Chief General Oscar Albayalde sa mga pulis may kaangtanan sa nagahilapit nga May 13 midterm elections.
Sa nangin mensahe ni Albayalde kadungan sang iya nga pagbisita diri sa Iloilo kahapon nga adlaw, liwat niya nga ginpahanumdom ang mga pulis sang ila katungdanan sa maabot nga pinili-ay.
Suno kay Albalayde, ang mga pulis ang dapat nga magsunod sa ginapatuman nga gun ban ilabi na sa sulod sang polling precint.
Sa pagpaathag ni Albayalde, kun magaboto ang isa ka pulis, kinahanglan nga indi pagdal-on ang service fireamrs apang kun yara sa official duty naman, exempted ang isa ka police officer sa pagdala sang armas.
Sa pihak sang manubo nga election related incidents sa bug-os nga pungsod, ginpahayag sang PNP Chief nga indi mag-untat ang pagpatuman sang police interventions agud nga matapna ang kriminalidad, gun for hire kag loose firearms.
Wala man nakaluwas kay Ablayalde ang mga pulitiko nga may yara sang goons sa diin suno sa iya, dapat nga manabat ang mga naglapas sa layi.
