Ginpatawag sang Philippine National Police – Supervisory Office for Security and Investigation Agencies (PNP-Sosia) ang security guard nga nakit-an sa viral video nga nagsipa kag nagtabog sa estudyante nga babaye nga may baligya nga sampaguita.
Suno sa Civil Security Group (CSG), kun basehan ang inisyal nga assessment, nalapas sang gwardiya ang ethical standards matapos ginbutong kag ginguba ang sampaguita nga ginabaligya sang babaye sang ginpahalin niya ini sa guwa sang mall.
Suno kay CSG Spokesperson Lt. Col. Eudisan Gultiano, ang security agency mismo ang ila ginmanduan nga amo ang magdala sang security guard sa SOSIA.
Posible nga sa masunod nga semana maga-abot sa ila opisina ang guard suno kay Gultiano. Pananglitan indi ini magpakita, mahimo suno sa iya nga sila pa mismo ang mag-initiate sa pag-file sang administrative complaint.
Una na nga ginpahayag sang mall management nga ginpahalin nila ang guard nga involved kag nagpanawagan man sa security agency nga magpatigayon sang imbestigasyon.
Sa bahin sang CSG, gindugang ni Gultiano nga multa tubtub sa suspensyon ang posible nga penalidad sa guwardiya — depende sa ma-assess nga kabug-aton sang lapses.
“Pagdating naman sa PSA (private security agency), maaring fine ang ma-impose na penalty. Titignan din natin yung extent, yung gravity ng kanilang lapses or pagkukulang sa pagha-handle ng sitwasyon. Titignan natin kung maari ba ipataw na suspensyon sa kanilang lisensya,” pahayag sini.
Una naman nga ginkumpirma sang Mandaluyong City Police Station nga na-identify na kag nakilala ang babaye nga yara sa video. Ginpahayag nga isa ini ka 18-anyos nga medical technology student nga nagabaligya sang sampaguita agud suportahan ang iya pamilya ilabi na bangud bag-o lang na-demolish ang ila balay sa Quezon City.
Ginklaro man sang pulis nga indi matuod nga kabahin ang babaye sa sindikato nga grupo nga nagapakuno-kuno lang nga estudyante.
“Ika-clarify po natin na ‘yong bata po ay totoo pong estudyante. In fact nga po, siya po ay isang scholar ng isang private institution at matalinong bata. Nagsusumikap lamang po na madagdagan ‘yong mga pangangailangan nila sa kanilang eskwela dahil po kade-demolish lang daw o ng bahay nila. ‘Yan po ay pinatunayan din ng barangay,” kabahin sang nangin statement ni Mandaluyong City Police chief Col. Mary Grace Madayag.#
