Ipatawag ni House Speaker Ferdinand Martin Romualdez sa isa ka emergency meeting subong nga adlaw ang Philippine National Police (PNP) kag ang Department of Interior and Local Government (DILG) agud ma-diskusyunan ang sunod-sunod nga high-profile crimes sa pungsod.
Suno kay Romualdez, naalarma na ini sa asud-asud nga pagluntad sang krimen nga involved ang mga opisyal sang gobyerno kag luyag man sini mahibaluan ang ginahimo sang otoridad agud matapna ini nga mga kaso.
Matandaan nga may natabo nga ambush sa service road sang Roxas Boulevard sa Pasay City sang Myerkules sang gab-i kun sa diin pilason ang alkalde sang Datu Montawal, Maguindanao del Sur nga si Ohto Caumbo Montawal.
Sang Pebrero 17, may ambush man sa boundary sang Lanao del Sur kag Bukidnon kun sa diin pilason si Lanao del Sur Gov. Mamintal Adiong Jr. kag patay ang iya apat ka security officers.
May yara man sang ambush sa Nueva Vizcaya sang Pebrero 19 kun sa diin patay si Aparri, Cagayan Vice Mayor Rommel Alameda kag ang lima pa ka kaupdanan.
Antes sini, una na nga nagmandu si PNP chief Gen. Rodolfo Azurin, Jr. sa tanan nga police commanders nga mag-conduct sang threat assessment sa tanan nga elected kag appointed officials sa ila tagsa ka area of responsibility agud mahibaluan kun may pamahog saila kabuhi. ##
