Ginpasalig sang Philippine National Police (PNP) nga hatagan sang hustisya ang 17-anyos nga bata nga napatay sang mga pulis sa Navotas City bangud sa ginpahayag nga “mistaken identity”.
Suno kay Brig. Gen. Redrico Maranan, public information officer sang PNP, nagapadayon na subong ang maid-id nga imbestigasyon agud matumod ang mga sirkumstansya nga naglab-ot sa kamatayon ni Jerhode Jemboy Baltazar kadungan sang police operation sa Barangay North Bay Boulevard South Kaunlaran sang Agusto 2.
Suno kay Maranan, siguruhon sang PNP nga mangin patas kag madasig ang imbestigasyon.
Anum ka police lakip ang isa ka executive master sergeant, tatlo ka staff sergeants, duha ka corporals kag isa ka patrolman ang nagapangatubang na subong sang panumbungon nga “reckless imprudence resulting in homicide” kag napaidalom na sa restrictive custody.
Sang amo nga tion, ginpahayag nga ginalagas sang mga pulis ang suspek sa shooting incident kag ginpahayag nga nagpanago ini sa baroto.
Base sa inisyal nga imbestigasyon, nasal-an sang mga pulis nga ang bata amo ang suspek nga ila ginapangita bangud nga naglumpat ang bata sa tubig halin sa baroto. Ulihi na nila nareyalisar nga indi amo nga tawo ang ila nga ginluthang.
Suno kay Maranan, ini ang rason kun ngaa sa baylo nga murder, kaso nga homicide ang na-file batok sa mga pulis pag-abot sa Navotas prosecutor’s office.
Nahibaluan man nga mangisda lang kuntani ang bata sang natiruhan patay sang mga pulis.
