Ginpasalig sang Department of the Interior and Local Government (DILG) nga naka-full alert ang Philippine National Police (PNP) sa posible pagbiya sa Pilipinas nanday former Senate President Chiz Escudero kag former House Speaker Martin Romualdez.
Ang duha ang pareho na nga nadagdagan sang Sandiganbayan sang Precautionary Hold Departure Order (PHDO) samtang nga padayon pa ang imbestigasyon sa ila ginapahayag nga kaangtanan sa kurapsyon.
Suno kay Interior Secretary Jonvic Remulla, nagapreparar na sila halin sang nag-file pa lang ang Ombudsman sang aplikasyon sa Sandiganbayan nga mag-isyu sang travel ban batok sa former Senate president kag former House speaker.
Pahayag ni Remulla, himuon nila ang tanan agud nga mapunggan nga makabiya ang duha sa pungsod.
Dugang sini, nakaalerto na ang Aviation Security Command, Maritime, provincial directors, regional directors, tubtub sa tanan nga pulis.
Suno pa sa iya, gina-monitor man sang PNP Maritime Group ang departure sang tanan nga barko apisar nga mabudlay para sa ila nga masundan ang borders sang pungsod.
“It’s a very porous country but we will do our best,” suno kay Remulla.
Pahayag pa niya, nakasapol na siya sa mga personnel agud nga hugton ang seguridad sa mga airport, coastal areas, maritime routes, kag backdoor exit points.
Subong lang nga Lunes, Abril 27, gin-isyu sang Sandiganbayan Sixth Division ang PHDO batok kay Escudero kaupod sa iya alleged bagman nga si Maynard Ngu.
Antes sini, gin-grant man sang Sandiganbayan Seventh Division ang petisyon sang Ombudsman nga mag-isyu man sang PHDO batok kay Romualdez.
Sa desisyon sang Seventh Division, ginsiling nga nakakita ini sang probable cause nga patihan nga magabiya ang respondent sa Pilipinas agud malikawan ang pag-aresto sa iya kag pag-atubang sa kaso.
Una na nga gin-request ni Romualdez ang travel clearance sa Singapore halin Abril 20 tubtub Mayo 4 para sa “long overdue follow-up” sa angioplasty surgery apang ginbalabagan ini sang Ombudsman.
Kasunod sang amo nga desisyon, nag-release sang video message si Romualdez nga nagapaandam nga indi siya magsugot nga himuon siya nga scapegoat agud nga mahilway ang iban nga amo dapat ang manabat.#
