ILOILO – Indi na kinahanglan ang bag-o nga layi agud mapauntat ang operasyon sang Philippine Offshore Gaming Operators (POGO) sa pungsod.
Sa interview sang Bombo Radyo kay Senate Minority Leader Franklin Drilon, iya ginpahayag nga ang reinforcement sang ‘executive action’ sang gobyerno amo ang dapat nga ipatuman agud nga matapna na ang gaming operations nga iya ginpahayag nga amo ang rason sang madamo nga krimen.
Pahayag sang senador, isa lang ka mandu sang Malacañang ang kinahanglan sang PAGCOR agud mashut-down ang amo nga negosyo.
Suno kay Drilon, bangud sa POGO, nagadamo ang prostitution, money laundering, homicide, kidnapping, kag iban pa nga insidente ilabi na sa Metro Manila.
Ginbasol man ni Drilon ang Philippine Amusement and Gaming Corporation ukon PAGCOR sa pagduging sang amo nga operasyon, bangud suno sa iya, nagadamo ang Chinese Nationals sa amo nga negosyo bangud ginapahanugutan sila apisar wala sang lisensya.
Suno pa sa opisyal, indi man daku ang mabulig sang POGO sa ekonomiya sang pungsod.
Kun matandaan, sa imbestigasyon sang senado kaangot sa nasambit na nga ‘dirty money’ nga dala sang Chinese nationals, ginkumpirma ni Anti-Money Laundering Council (AMLC) Executive Director Mel Georgie Racela nga ang net inflow halin sa POGO ang nagalab-ot lang sa P7 billion ukon .29% sang P18.6 trillion nga balor sa Philippine economy.
Suno kay Drilon, wala sang nakita nga rason ang senado kun ngaa indi pa pag-i-shut down ang operasyon sang POGO.
Nahibaluan nga sa hearing sang Senate blue ribbon committee subong nga semana, ginkadlawan lamang ni Drilon ang pahayag ni Victor Padilla, senior manager sang licensing department sang PAGCOR.
Ginpahayag ni Padilla nga indi tanan nga operators ang naghalin sa pungsod China kag suno pa kay Padilla: “If it was reported to us that a player is coming from China and China says that we should close down, we will close down the company if there are reports.”
Ginbali naman ni Drilon ang amo nga paathag sang opisyal kag ginpahayag nga indi probinsya sang China ang Pilipinas nga nagakinahanglan pa sang advisory agud lamang mahibaluan kun ano ang illegal kag indi.
