ILOILO CITY – Ginakabig nga isa na ka breakthrough para sa kapulisan ang nag-gwa sa examination sang Regional Crime Laboratory 6 nga ang 9mm nga gingamit sa pagluthang patay kanday Allain Muller kag Delfin Britanico sa syudad sang Iloilo sang Enero 19 ang gingamit na sang tuig 2012 nga summary execution.
Ang biktima sang Abril 18, 2012 nga summary execution amo si Mishrhym Occillo.
Sa interview sang Bombo Radyo kay Pol Lt Col Joem Malong, tagpamaba sang Police Regional Office (PRO 6), iya ginpahayag nga mahimo nga isa ka lang ka grupo ukon persona ang nagpatay sa tatlo ka mga biktima apang may posibilidad man nga ginbaligya sang tag-iya ang amo nga 9mm.
Posible man suno sa natungdan nga may ginhatagan lang sang armas.
Kinahanglan man ang madamo nga direct evidence kag mga witnesses agud nga maangot ang nasambit nga shooting incident kag lakip na ang natabo sang tuig 2012.
Bangod diri, suno kay Malong, mahimo nga mabuksan liwat ang kaso ni Occilla ilabi na nga wala pa naglapaw sa 20 ka tuig ang kaso.
Kun masolbar ang kaso subong nga tuig, dako ang posibilidad suno kay Malong nga ma solbar ang kaso sang 2012.
SUNO SA PAMILYA.
Ginbalikan man sang Bombo News Team ang pamilya ni Occillo bangud ini nga kaso ang pinakamalapit nga shooting incident nga mahimo maangot sa kaso nanday Muller kag Britanico, apang indi pa ini conclusive tubtob subong ilabi na bangud nagapadayon man ang imbestigasyon sang kapulisan.
Suno kay Roberto Occillo, nagakaalimunaw na ang kaso sang iya anak kag wala sang resolution nga nakita tubtob subong.
Nakit-an ang bangkay ni Mishrhym sa Brgy. Sooc, Arevalo, Iloilo City nga may yara sang plastic bag nga nakatabon sa iya ulo, may nakahigot nga tela sa iya bibig kag nakahigot man sang packaging tape ang iya mga kamot sa likod.
Suno sa natungdan, kun iya balik balikan ang natabo nga summary execution, nagapati siya nga bad record sang iya anak ang rason kun ngaa ginpatay ini.
May grupo suno sa iya si Mishrhym kag may hitabo nga gin-snatch sini ang kwarta sang anak sang isa ka Police Colonel sa Iloilo kag nagapati siya nga ini ang isa sa posible suspek sa amo nga krimen.
Nagapati man si Occillo nga isa sa mga abyan sang iya anak ang naghatag sang impormasyon sa mga suspek amo nga natabo ang summary execution.
Suno kay Occillo, Abril 17 sang ginkuha sang isa ka pick up si Mishrhym sa presuhan sa Jaro, kag kun binag-binagon niya, mahimo nga sa amo man nga gab-i natabo ang krimen apang Abril 18 na sang nakit-an ang lawas amo nga amo ini ang record nga ginakaptan sang kapulisan.
