ILOILO CITY – Nagalaum si President Ferdinand Marcos, Jr. nga dumdumon sa pila ka adlaw bilang isa ka tawo nga nagbulig sa mga Filipinos.
Sa iya latest vlog, ginpahayag sang presidente nga ang pagserbisyo sa publiko sa maayo nga paagi amo ang iya pinakamanami nga legasiya.
Ini ang ginpahayag sang presidente matapos nga gin-feature ang tatlo ka mga mansions sa gin-lunsyar nga Malacañang Heritage Tour kag ang iya panan-awan sa importansya sang maragtas.
Ang amo nga tour ang naga-feature sang mga nagligad nga Philippine presidents.
Sang ginpamangkot kun ano nga legasiya ang gusto niya nga ibilin bilang lider sang Pilipinas, ginpahayag ni Marcos nga wala niya ginapanumduman ang ina nga mga butang bangud madamo sang kinahanglan nga ulubrahon gani, trabaho anay ang unahon.
Suno pa sa iya, kun manami man ang mga ginpang-ubra, makabig na ina nga legasiya.
Apang suno sa presidente, indi man ini dapat nga isipon.
Ang iya nga legasiya amo nga kun wala na siya, nagalaum ini nga madumduman bilang isa ka tawo nga nagbulig sa normal nga Pilipino.
Ginbalik-balikan man sang presidente ang iya nangin kampanya sang May 2022 elections kag ginpahayag niya nga nahidlaw siya nga makig-istorya sa iya mga supporters.
Dugang pa niya, daw kaangay nga nagbalik sa election campaign sa liwat sang gintamyaw siya sang iya mga supporters sa “Bahay Ugnayan” sang ginlunsyar ang heritage tour.
Ang Bahay Ugnayan ang naga-feature sang nangin journey ni Marcos sa pagpungko bilang presidente kag puluy-an sang iya nga campaign memorabilia.
Ang tagsa ka memorabilia ang may yara sang istorya suno pa sa iya.
Ang presidente ang maga-deliver sang iya ikaduha nga State of the Nation Address sa masunod nga semana agud nga iplastar ang iya mga accomplishments sa tion sang iya una nga tuig sa Palasyo.
