ILOILO CITY – Nagakadapat nga i-settle anay ni President Ferdinand “Bongbong” Marcos Jr. ang iya nga mga tax obligations agud nga ang mga Pilipino ang ma-enganyo nga magbayad sang buwis.
Ini ang suno kay National Economic and Development Authority (NEDA) chief Ernesto Pernia kasunod sang pagpangita sang dugang nga government revenues sang Marcos administration kadungan sang nagapadayon nga COVID-19 pandemic kag pagtaas sang nagapanguna nga balaklon.
Suno kay Pernia, nagakadapat nga mangin ehemplo ang presidente sa pagbayad sang buwis.
Sang 1997, ang Supreme Court ang may ruling with finality nga ang pamilya Marcos ang may utang sa gobyerno nga ₱23 billion sa estate tax.
Ang utang ang nagtimbuok pa sa ₱203 billion bangud sang penalties kag surcharges.
Ang utang sa buwis ang nangin campaign issue sa anak sang anay dikatdor nga si Ferdinand E. Marcos, Sr.
Ang Partido Federal ng Pilipinas nga amo ang political party ni Marcos ang nagpahayag nga ang ruling sang high court nga ₱23-billion tax liability ang final kag executory apang ang surcharges sa pila na ka tuig ang subject sa reconciliation.
Suno kay Pernia, ang insakto nga tax administration ang mangin lyabe para sa Marcos administration agud nga mag-raise sang revenues kadungan sang mataas nga utang sang gobyerno bangud sang pandemic response sang gobyerno.
Ang anay NEDA chief ang pabor man sa paghatag sang tax sa digital transaction bilang maayo nga source sang additional revenues.
Sa subong, ang utang sang pungsod ang nagdangat na sa ₱12.5 trillion sa katapusan sang Mayo.
