ILOILO CITY – Padayon nga naga-ulan ang pagpabutyag sang simpatiya sa mga rescuers sa Bulacan nga nagtaliwan sa ginpatigayon nga rescue operation sa paglaslas sang bagyong Karding.
Lakip sa mga nagpabutyag sang simpatiya amo si President Ferdinand Marcos Jr. pinaagi sa iya twitter account.
Suno sa presidente, nadulaan ang Pilipinas sang lima ka mga maayo nga tawo.
Ang senado ang nagpasar sang pila ka mga resolutions nga naga-commend kag nagakilala sa “exemplary heroism” sang lima ka mga katapo sang Bulacan Provincial Disaster Risk Reduction and Management Office.
Lakip sa mga resolutions amo ang proposed Senate Resolution 233 kag proposed Senate Resolution 240.
Ginhingadlan sang Local Disaster Risk Reduction and Management Office ang mga biktima nga amo sanday George E. Agustin, 45, residente sang Ina ‘O’Este, Calumpit; Troy Justin P. Agustin, 30, residente sang Sta Rita, Guiguinto; Marby A. Bartolome, 36, residente sang Bulihan, City of Malolos; Jerson L. Resurreccion, 32, residente sang Barangay Catmon, Sta Maria; kag Narciso Calayag, residente sang Malolos City.
Kun balik-balikan ang natabo, sandig pa sa inisyal nga mga pahayag sang otoridad, indi masarangan sang truck ang kadalumon sang baha nga ginkadtuan sang rescuers rason nga naggamit sila sang gamay nga sakayan. Ginapahayag nga well equipped kag well trained ang rescuers kag may reports pa nga nagasiling nga may iban nga residente nga nakabati nga dululungan sila nga nagaisip samtang nagasakay sa baroto.
Sang amo nga tion, ginapahayag nga nag-collapse ang pader sang Gulf Gasoline Station sa Barangay Camias rason nga gulpi nga nagbaskog ang daludo sang tubig rason sang pagkalumos sang mga biktima.
Samtang, suno sa National Disaster Risk Reduction and Management Council, nagdangat na sa walo ang nagkalamatay.
Tatlo naman ang missing.
