ILOILO CITY – Igaduso ni President Ferdinand “Bongbong” Marcos Jr. ang agenda sang Pilipinas sa food and energy security, paglakip sa mga magagmay nga negosyp kag digitalization sa iya pagtambong sa 30th Asia Pacific Economic Cooperation Leaders’ Summit sa Estados Unidos.
Kagab-i, nagbiya sa pungsod ang presidente upod sa pila ka mga opisyal kag mamalidha sang pungsod.
Sa departure speech sang presidente sa Villamor Airbase sa Pasay City, ginpahayag niya nga ang summit subong nga tuig nga may tema nga ‘Creating a Sustainable and Resilient Future for All’ ang nagasanto sa national kag economic interest sang pungsod nga mag-transform padulong sa isa ka “sustainable future” agud nga ang tanan nga Pilipino ang maka-agum sang masanyog, matawhay kag maayo nga pagpangabuhi.
Suno kay Marcos, ang iya ikatatlo nga pagpadulong sa Estados Unidos humalin sang siya ang nangin presidente ang imbitasyon ni President Joe Biden nga amo ang nagapungko nga chairman sang summit nga kilala sa importante nga platform sini para sa trade, investment kag economic cooperation.
Sa Asia Pacific Economic Cooperation Leaders’ Summit nga tuigan nga pagtililipon sang nagapanguna nga chief executive officers nagikan sa Asia Pacific Economic Cooperation region, ginpahayag ni Marcos nga magahatag siya sang keynote remarks sa “intentional equity in sustainability” agud nga magpakigbahin sang naagyan sang Pilipinas sa pagpasiguro sang inclusivity sa dalan padulong sa maayo nga ekonomiya.
Makigkita man siya sa mga business leaders kag magpatigayon sang roundtable discussions sa sidelines sang summit agud nga mag-imbitar sang mga investments kag magpangita sang business opportunities, mag-promote sang Philippine exports, kag mag-discuss sa economic agenda sang iya administrasyon.
May yara man sang patigayunon nga mga engagements sa private sector representatives nagikan sa Asia Pacific Economic Cooperation Business Advisory Council agud nga hambalan kun paano ang Pilipinas makagamit sang public-private partnership para sa agenda sang pungsod sa innovative kag sustainable development, finance, kag economic and business reform.
Ginpahayag man ni Marcos nga ginalauman niya nga maka-witness sa pagpirma sang pila ka government-to-government, public-private, kag business agreements, nga gina-negosyar na humalin sang nagligad nga mga binulan.
Ang ini nga mga deals ang nagalakip sang priority sectors, kaangay sang nuclear energy; artificial intelligence agud magsuporta sa weather forecasting; health sciences partikular na ang cancer research, diagnosis, treatment, kag prevention; pharmaceutical manufacturing; kag satellite connectivity.
Nagikan sa San Francisco, magalupad naman si Marcos sa Los Angeles kag sa Honolulu, Hawaii.
Makigkita man siya sa Filipino communities sa amo nga mga lugar.
Ang California kag Hawaii ang may pinakadako nga concentrations sang Filipinos kag Filipino-Americans, nga puluy-an sang halos katunga sang 4.2 million Filipinos sa Estados Unidos.
Ang Asia Pacific Economic Cooperation region ang naga-host sang 38% sang populasyon sang kalibutan, 48% sang trade, kag 62% sang gross domestic product.
