ILOILO CITY – Nakahibalo si President Ferdinand Marcos, Jr. sa plano sang Sugar Regulatory Administration (SRA) nga mag-import sang kalamay antes pa man gin-isyu ang controversial nga Sugar Order (SO) No. 4 nga gintawag sang Malacañang nga iligal.
Sa ginpatigayon nga ikaduha nga Senate Blue Ribbon investigation sa “sugar fiasco,” ginpahayag ni Department of Agriculture (DA) undersecretary Leocadio Sebastian nga ginpahibalo nila si Marcos sang proposal nga mag-import sang kalamay agud nga ma-address ang naganubo nga suplay sang nasambit nga produkto.
Suno kay Sebastian, duha ka bagay ang gusto nga padasigon sang presidente nga iya nga ginpahayag sa meeting.
Una, reclassification halin sa reserved pakadto sa domestic use sang kalamay.
Ikaduha, ang pag-augment sang local supplies pinaagi sa importation.
Dugang pa niya, ginplastar sang SRA Administrator ang kakulang sang suplay sang kalamay kag nagpasugot man ang presidente.
Sa pagkamatuod, sang Agosto 4 nga meeting, ginpahayag SRA administration Hermenegildo Serafica kay Sebastian nga may yara siya sang nabaton nga instruction nga mag-draft sang importation program nagikan sa presidente.
Sang nagligad nga hearing, ginpahayag ni Executive Secretary Vic Rodriguez nga nakibot ang palasyo sang SO No. 4 sang SRA bangud wala pa na-aprubahan ni Marcos ang importation plan.
Samtang, gin-ako naman ni Pablo Lobregat nga presidente sang Philippine Sugar Millers Association nga sila ang nag-recommend sang 3000, 000 metric tons sang kalamay nga nabutang sa SO No. 4.
