ILOILO CITY – Gindula ni President Ferdinand “Bongbong” Marcos Jr. ang kahangawa sang publiko batuk sa monkeypox virus matapos nga gin-anunsiyo sang nagligad nga semana ang pinakauna nga kaso sang amo nga virus sa pungsod.
Suno sa presidente, masubo bangud nga may yara na sang kaso sang monkeypox sa pungsod apang ginpasalig sini nga ang gobyerno ang padayon nga naga-monitor sang sitwasyon.
Dugang pa niya, kinahanglan nga matinlo lamang ang kamot sa tanan nga tion kag kinahanglan nga maghalong sa sanitation.
Nahibaluan nga gin-anunsiyo sang Department of Health (DOH) nga ang Pilipinas ang naka-record sang monkeypox virus sa isa ka 31 anyos nga pasyente nga nag-abot sa pungsod sang Hulyo 19 kag nagpositibo sa virus sang Hulyo 28.
Sa subong, ang pasyente ang padayon nga nagapa-ayo sa balatian.
Una na nga ginpahayag sang World Health Organization nga ang monkeypox ang mahimo nga maglapta pinaagi sa close skin-to-skin contact sa tion sang pagpakighilawas lakip na ang paghalukanay, kag iban pa nga sahi sang pagpakighilawas sa isa ka indibidwal nga may sintomas.
