ILOILO CITY – Ginmanduan ni Presidente Ferdinand “Bongbong” Marcos Jr. ang Department of Justice kag National Bureau of Investigation nga imbestigaran ang smuggling sang bombay kag iban pa nga agricultural products.
Suno sa Presidential Communications Office, ginpahayag ni Marikina Rep. Stella Quimbo sa isa ka memorandum sa presidente nga may yara sang bastante nga ebidensya nga makatudlo nga may yara sang onion cartel nga posible sa likod sang pagtimbuok sang presyo sang bombay sang 2022.
Dugang pa ni Quimbo, ang cartel nga naga-operate pinaagi sa isa ka grupo sang kompaniya ang na-angut sa nagkalain-lain nga aktibidad sa supply chain kaangay sang pagpanguma, importation, local trading, warehousing, kag logistics.
Suno kay Marcos nga nagapungko man bilang tiglikom sang Department of Agriculture, tuman ka importante ang findings bilang bastante nga ground sa pagpatigayon sang imbestigasyon ilabi pa nga kinahanglan man nga solbaron ang economic sabotage.
Amo ini ang rason suno sa presidente nga tuman ka seryoso ang gobyerno sa pagpangita sang mga tawo sa likod sini kag masiguro nga makuha ang hustisya.
