ILOILO CITY – Liwat nga ginduso ni President Ferdinand Marcos Jr. ang pagbalik sang mandatory nga Reserve Officers’ Training Corps (ROTC) program sa mga eskwelahan.
Sa weekly vlog sang presidente, ginpahayag sini nga kinahanglan sang pamatan-on nga magtuon angut sa disaster-preparedness skills ilabi na sang gintay-og sang linog ang pila ka bahin sang Northern Luzon.
Suno sa presidente, sa iya pagbisita sa mga naapektuhan nga probinsya, nakita niya nga kinahanglan ang dugang nga kamot para sa disaster zones.
Ginpahayag pa sang presidente nga indi lamang national defense ang ginatudlo sa mga nagakuha sang ROTC kundi mangin ang disaster preparedness kag capacity building para sa risk-related situations.
Apisar suno sa iya nga duna na sa mga Pilipino ang mabinuligun, lain gid kung may training kag insakto nga pagpanghanda sa pagresponde.
Bangud sini, liwat niya nga ginduso ni ang pagbalik sang ROTC program ilabi na nga ang Pilipinas ang isa ka disaster-prone country.
Matandaan nga una niya nga ginduso ang pagbalik sang ROTC sa iya pinakauna nga State of the Nation Address (SONA).
Sa una niya nga report sa Kongreso, ginpahayag sini nga tuyo niya nga himuon nga mandatory ang ROTC sa senior high school program kag sa tanan nga public kag private tertiary-level educational institutions.
Katuyuan sini nga ma-motivate, ma-train, ma-organize kag ma-mobilize ang mga estudyante para sa national defense preparedness lakip na ang disaster preparedness kag capacity building para sa risk-related situations.
Ang ROTC ang ginkakas sa mga eskwelahan sang 2002 matapos nga isa ka estudyante sa University of Santo Tomas ang napatay bangud sang expose sa anomaliya sa training corps.
