ILOILO CITY – Nagpasalig si President Ferdinand “Bongbong” Marcos Jr. sa Filipino community sa Singapore nga himuon niya ang tanan agud nga mapa-ayo ang kondisyon sa lokal agud nga ang mga overseas Filipino workers (OFW) ang mahimo nga magpauli.
Sa una nga adlaw sang state visit ni Marcos sa Singapore, nagpakigkita siya sa Filipino community sa Ho Bee Auditorium sa National University of Singapore kun sa diin, kaupod niya si First Lady Liza Araneta-Marcos, Ilocos Norte 1st District Representative Sandro Marcos kag pila ka myembro sang gabinete kag mga senior officials.
Suno kay Marcos, nalipay siya nga nakita niya ang mga Pinoy nga nag-ulupod sa isa ka pungsod apisar sang tuman ka nubo nga tyempo kag sa pagboto sa iya apisar nga wala siya nakapangampanya sa gwa sang pungsod.
Dugang pa niya, ang iya gobyerno ang nagatrabaho indi lamang agud nga mapasanyog ang mga Pilipino sa pungsod kundi mangin ang mga OFW.
Ang pagbisita niya sa Singapore ang may katuyuan nga ma-fully maximize ang trade and economic cooperation sang pungsod sa city-state.
Antes ang event proper, gintamyaw sang mga Pilipino si Marcos para sa iya kaadlawan sa Septyembre 13.
Nahibaluan nga yara sa 200, 000 ka mga Pilipino ang nagatrabaho ukon nagapuyo sa Singapore.
Una na nga ginpahayag sang Department of Foreign Affairs (DFA) nga ang Pilipinas kag Singapore ang ginalauman nga magapirma sang mga agreements sa cybersecurity kag data privacy sa pagbisita ni Marcos.
Magapatigayon sang separado nga bilateral meeting si Marcos upod kay Singaporean Prime Minister Lee Hsien Loong kag President Halimah Yacob kag magatambong sa pagsinapol upod ang business community.
