ILOILO CITY – Liwat nga nagpasalig si President Ferdinand “Bongbong” Marcos Jr. nga unahon niya ang pag-develop sang agricultural land agud nga mapasanyog ang crop production sang pungsod.
Sa speech nga gin-deliver ni Presidential Assistant for Northern Luzon Assistant Secretary Ana Carmela Remigio sa ika-36 nga Cordillera Day Commemoration, ginpahayag ni Marcos nga bilang presidente kag concurrent Agriculture Secretary, ginaduso kag gina-prioritize niya ang pag-develop sang agricultural lands.
Suno sa presidente, kinahanglan sang pungsod nga mag-invest sa development, productivity, kag modernization sang agricultural sector.
Natalana kuntani nga magtambong si Marcos sa event apang ginkanselar niya bangud sang malain nga tyempo.
Ginpahayag man ni Marcos nga pinaagi sa pagtukod sang infrastructure kag pagpa-umwad sang market linkages sa mga mangunguma, dako ang produkto sang mga talamnan kag makahatag sang uportunidad nga makabulig sa pungsod.
Gin-enganyo man niya ang publiko nga magpadayon sa pagsuporta sa tinutuyo sang gobyerno nga mas maayo, mas masanag kag mas produktibo nga kabuhi para sa tanan.
