ILOILO CITY – Nagalaum ang Philippine National Police (PNP) nga mas mapaayo ang relasyon sang katapo sang media kag mga pulis.
Ini ang kasunod sang ginpatigayon nga duha ka adlaw nga media relations seminar.
Sa interview sang Bombo Radyo kay PRO-6 Director Police Brigadier General John Bulalacao, iya ginpahayag nga katuyu-an sang nasambit nga seminar amo nga mapaayo ang relasyon sang media kag pulis ilabi na sa patag sang information dissemination.
Ginpahayag ni Bulalacao nga madamu siya sang nabaton nga reklamo tuhoy sa mga hepe ukon police officer nga nagapamalibad, matamad ukon wala nagahatag sang impormasyon sa katapo sang media.
Sa pagpaathag niBulalacao, katungdanan sang isa ka pulis nga maghatag sang impormasyon sa tion nga may magtawag ukon magpangayo nga katapo sang media magluwas lang kun may yara sang rason nga indi mahimo nga ipalayag ang impormasyon.
Ginakabig naman sang PRO-6 Director nga malapad ang sakop sang media nga may katungdanan sa pagpahibalo kag pagpahangop sa publiko tuhoy sa nagakatabo sa palibot.
Sa pihak sini, ginpahayag sang natungdan nga nagakadapat man nga nahangpan sang media kun ano ang limitasyon sa pagpalayag sang balita.
