ILOILO CITY – Wala sang problema para sa Police Regional Office 6 kun himuon nga basehan ang existing anti-smoking ordinance sang syudad sang Iloilo sa pagpangdakop sa mga nagagamit sang vape sa pampubliko nga lugar.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga wala sang may ginlapas nga layi ang Iloilo City Police Office ilabi na ang Mandurriao PNP bangud nga may yara man sila sang layi nga ginbasehan.
Suno kay Malong, sa iban nga rehiyon, ang ila nga ginbasehan amo ang Clean Air Act kun sa diin sa Article 5, nakasaad nga ginadumili-an ang pagpanigarilyo sa sulod sang isa ka pampubliko nga building, lugar, salakyan kag sa mga indi smoking area.
Sa subong, ginahulat nila suno sa natungdan ang executive order gikan sa Malacañang may kaangtanan sa mandu sang Presidente.
