ILOILO – Ginmanduan ni Police Regional Office 6 Director PB Gen Rene Pamuspusan ang tanan nga mga mga chiefs of police nga dakpon ang mga may kaangtanan sa illegal gambling.
Sa interview sang Bombo Radyo kay PBGen Rene Pamuspusan, iya ginpahayag nga apisar si Philippine National Police Director General Archie Francis Gamboa ang nagapati man nga indi mahinago nga may yara sa gihapon sang illegal gambling activity sa pungsod.
Bangud sini, liwat nga nagpahandumdom si Pamuspusan ang no take policy sa mga kapulisan lakip man ang paglagas sang mga iligalista.
Suno kay Pamuspusan, indi lang mga pulis sa kada istasyon ang gamiton agud nga madakpan ang mga ini, gamiton man diri ang Regional Intillegence Division, ang Regional Integrity Monitoring and Enforcement Group kag ang Regional Mobile force agud nga mag bulig sa mga provincial directors.
Dugang sang natungdan, may yara man sang 1 strike policy sa mga chiefs of police nga wala sang ihibalo kag wala sang koordinasyon sa iban nga units nga mag operate sa ila areas of responsiblities.
Ginpahayag ni Pamuspusan nga base sa iya nga assesment, ang illegal gambling diri sa Western Visayas ang magamay kung ikumparar sa iban nga rehiyon, wala sang organized apang gina manduan sa gihapon ang tanan nga mga Chief of Police siguraduhon nga madakop ang mga nagapatigayon sang ilegal nga mga aktibidad.
Samtang, suno sa natungdan, masami nga mga makaladakpan sa iligal nga bookies ang mga magagmay nga operators.
Dugang pa niya, isa man ka paagi sang pulis nga madakpan ang sa likod sini ang pagdakop una sa mga yara sa idalom, matapos sini diri na ma mahibaluan kung sin-o ang yara sa ibabaw.
May yara naman sang listahan ang PRO6 sang mga posible lider sang mga magagmay nga mga operators sa diin iban diri ang retired nga mga pulis, mga dalagko kag kilala nga mga persona kag ang iban ang madugay na nga operator.
May mga reports man nga may isa ka active Pol Col sa probinsya nga amo ang sa likod sang illegal gambling.
Nagpasalig ang natungdan nga siguraduhon nila nga magapangatubang sang nagakaigo nga silot ang sinuman nga madakpan nga yara sa likod sang pagpatigayon sang mga ilegal nga aktibidad sa rehiyon.
Gin panugayanan man niya ang mga katapo sang media nga buligan sila sa ila nga kampanya kampanya batok sa ilegal gambling.
